ESQUE IT NE ES GAY QUALMEN LI TÉMPOR PASSA?

Obscure legende 

Original scrit in Interlingue de Thomas Schmidt

 

I.

Yo ja sempre odiat nor céllar. It es obscur, humid e strett. Yo sempre have un strangi timore si yo es in it. Yo evita intrar in it solitarimen, si yo posse. Si yo es acompaniat de un altri person ti mal sentiment ne es tam fort. Ma yo ne vole descender in it durant li nocte. Yo sempre sentit me observat in li céllar. Yo ha dit to anc a mi genitores, ma ili solmen ride e moca me. Mamá sempre di: "O mi povri Jessica. Tu have ja 15 annus, ma quelcvez tu es ancor quam un litt flicca."

Yo tolera ti moca si it auxilia me evitar que yo deve descender in li céllar solitarimen. Ma regretabilmen li machine por lavar e nor trincages es in li céllar. It es un grand fortun que yo have un seniori fratre e normalmen il porta li trincages por mi genitores ex li céllar in li véspere. Ma desde Moritz have un fix amica, il es rarimen in hem in li vésperes. E pro to it esset solmen un question del témpor til quocunc devet evenir.

It esset durant un pluviosi véspere in li autun. Mi patre esset sur un viage del labor. Mi fratre hat surtit con su amicos. Yo esset solitarimen in li dom con mi matre.Yo esset in mi chambre e mamá esset in li salon e ella regarda li television. Subitmen ella intrat in mi chambre. Yo jacet sur li lette e leet li nov numeró del jurnal "Bravo".

"Carissima, esque tu posse portar me un botell de aqua mineral ex li céllar?", ella petit me.

Yo comensat frissonar.

"O mamá, yo pensa que it es ancor un botell in li refrigerator", yo provat escapar ex ti dangerosi situation.

"No, regretabilmen ne. E noi anc besona un botell in li refrigadator por deman, Jessi", mi matre replicat.

Yo provat evitar descender in li céllar per un altri maniere: "Ma mamá yo ha leet que aqua ex li robinette es plu salubri."

Mamá solmen subridet e dit: "Un bon prova, Jessi. Esque tu denov have timore descender in li céllar?"

Ella regardat a me. Yo sentit me captet. Mamá aspectet amusat e adjuntet: "Jessi, mi car filia. Yes, yo pensa que tu ancor time ear in li céllar. Tu va devenir bentost 16 annus, Jessi. Tu deve aprender superar tal infantin timores."

Yo ancor ne hat capitulat.

"Ma yo ancor ne have 16 annus. E yo save que li céllar es dangerosi, mamá. Vermen! Pro quo vu ne crede me?", yo respondet con desesperat voce.

Támen it ne havet li desirat efecte. Nam nu mi matre incolerat.

"Tu descende strax in li céllar por portar du botelles de aqua mineral. Li discussion es finit", ella replicat strictmen.

Yo hat perdit e yo savet it. Nu yo vermen devet desender in li céllar durant li véspere.

Yo strax sentit un nausea in mi stomac e mi génus tremet. Yo sentit me quam ínmediatmen ante un execution.

Prudentmen yo apertet li pesant porta al céllar. It esset ex stal pro que ta anc esset li gas-calentation de nor dom. Por un brevi moment yo pensat que yo hat audit un rision. Ma fórsan it esset solmen in mi imagination. Yo cludet prudentmen li porta del céllar. It fat un bruida quam yo vell aperter li porta de un cárcere e yo sentit me ínmediatmen quam un prisonaria.

Yo comutat li luce e regardat ad-infra. Prudentmen yo decendet li decitri scalunes del scaliere. Quande yo hat dit a mi genitores que it ne es bon haver un scaliere con exactmen decitri scalunes ili hat solmen ridet. Ella mocat me que yo es tant supersticiosi. Finalmen yo atinget li fine del scaliere. Solmen quelc passus separat me del botelles de aqua mineral.

Yo volet les rapidmen prender e pos to currer ad-supra.

Ma in ti moment it evenit. Li luce flammeat e finalmen extintet se. Subitmen it esset totmen obscur in li céllar.

Yo glotit e clamat: "Mamá! Ples auxiliar me!"

Ma li spess stal-porta esset cludet e yo esset cert que ella ne posset audir me. Prudentmen yo provat mover me al direction del scaliere.

Nu yo esset cert que yo hat audit un rision e subitmen un strangi voce mascul dit: "Jessica, esque it ne es gay qualmen li témpor passa?"

Yo esset rigid pro timore e criat: "Qui es ci? Quo vu vole de me?"

In vice de un responde yo audit un strident rision e por quelc secondes li luce denov flammeat. Yo posset vider que sangue fluet along li paretes del céllar. Yo criat tam bruiosimen quam yo posset e curret in li direction in quel yo suposit li scaliere. Mi dextri ped colidet con li unesim scalun. Yo criat ex dolore, ma yo hastat mispassuante ad-supra. Pro li tenebre e pro panica yo mispassuat ancor quelc vezes, ma pro timore yo ne sentit plu alcun dolore.

Finalmen yo atinget li porta.

E tande sequet un nov choc. Yo ne posset aperter li porta. Yo conduit me quam un litt infanta. Yo plorat e criat: "Mamá! Ples auxiliar me! Rapidmen!" Yo battet con mi punies al porta e apoyat me con mi tot córpor contra li porta, ma sin resultate. Yo es totmen desesperat e martellat criante con mi punies al maledit porta. Pro quo mamá ne audi me? Yo ne posset comprender to. Yo devenit plu e plu rabiat e curret con mi cap al porta. Ma to ne esset un bon idé. Yo sentit un curt dolore in mi cap e li munde devenit nigri avan mi ocules e yo perdet li conscientie.

 

 

II.

Yo ne save quant témpor hat passat quande yo avigilat me. Yo ancor esset in li céllar avan li porta. Strangimen mi cap ne dolet plu. Yo provat comutar li luce sin grand esperantie. Ma vermen it funcionat e li luce aciecat me. Yo palpebrat e yo posset vider que li céllar aspecte totmen diferentmen. Quo hat evenit? Yo vocat mi matre, ma yo recivet null response. Dunc yo provat aperter li porta. E vermen li stal-porta apertet se e yo forlassat li céllar.

Yo audit li aterret voce de mi matre: "Qui es ta?"

Yo esset tre felici e respondet: "Yo, mamá. Yo ne ha portat li botelles de aqua mineral. Pardona me! Li luce ne funcionat e yo ne posset aperter li porta. Esque tu ne ha audit mi criada?"

Mamá criat e curret ex li salon vers me. Ella aspectet strangi, trist e plu old. Ella havet subitmen mult grisi capilles quam alquó terribil hat evenit. Ella regardat a me quam yo vell esser un fantoma.

Mi matre apertet li bocca e criat con alt voce: "Jessica? Esque tu es vermen ci?"

Ella comensat plorar e lácrimes covrit su visage e anc yo havet subitmen lácrimes in li ocules. Yo inbrassat la e esset tre felici. Plorante mamá questionat me con bass voce: "Jessi, u tu esset tant long e de u tu ha venit nu?"

"In li céllar, máma. Li porta hat cludet e yo ne posset aperter it. Esque tu ne ha audit mi cris? It esset vermen horribil!", yo replicat.

Nu mi matre aspectet presc un poc incolerat.

"Jessica, ples dir li veritá. Tu esset desaparit exactmen un tot annu. Noi ha serchat te partú. E hodie es li anniversarie de tui desaparition. E alquam yo savet que alquó va evenir", ella explicat me.

Yo es totmen surprisat e chocat. To ne posset esser ver!

"Un annu? To es un joca!", yo criat.

Mamá inclinat li cap e plorat denov. Ma mi matre monstrat con su manu al calendare quel pendet al parete e vermen un annu hat passat!

Ella murmurat."Jessi, quo tu ha fat durant ti annu? U tu esset, carissima?".

Subitmen yo memorat to quo li voce hat dit in li céllar. Nu yo vermen comprendet quo it volet dir a me.

Yo devet rider con alt voce quam un alienat person. Lácrimes denov plenat mi ocules. Yo regardat a mi matre e dit: "Mamá, esque it ne es gay qualmen li témpor passa?".