RAPORTE DEL INCONTRA DE INTERLINGUE 7-IM DE APRIL 2014 IN MÜNCHEN

To quo comensat in li passat annu in Ulm continuat ho-annu in München. Li tri activistes de Interlingue Erich Werner (Svissia), Thomas Schmidt (Germania) e Donald Gasper (China) incontrat se personalmen por discusser li situation del Interlingue movement e por interchangear idés.

Li max important temas del conversation esset li futur del Interlingue Union e li possibilitá de arangear un international congress de Interlingue.

Erich Werner quam secretario (administrator) del Interlingue Union raportat pri li actual situation del Interlingue Union. Thomas Schmidt e Donald Gasper suportat li idé transformar li Interlingue Union in un plu fort organisation. Li participantes consentit crear un formulare "carte de adhesion al Interlingue-Union" quel va esser inviat al abonates del jurnal "Cosmoglotta" con li invitation devenir membre del IU, sur li base del statutes actualmen in valore e notabilmen con li jure de votation, ma sin un definit annual financiari contribution. Li administration por un tal obligatori contribution vell esser tro grand e li hodial international bank custas tro alt. Ma un voluntari pecuniari contribution secun li vole e possibilitá de chascun membre va naturalmen sempre esser tre benevenit por garantir que Cosmoglotta es inviat gratuitmen al membres e interessates anc in li futur.

Senior Bedrich Plavec de Tchekia e Senior Werner redacte juntmen li jurnal Cosmoglotta. Sr. Werner petit inviar articules por li révue por garantir que Cosmoglotta posse aparir in just témpor. Si it es possibil li redaction vole haver li contributiones circa tri mensus ante li aparition del jurnal por li necessi revision. Til nu Cosmoglotta es publicat in li januar e in li julí, dunc duvez in li annu.

Erich Werner anc informat que li Interlingue Union va haver bentost un nov internet-págine. Li old págine esset registrat per Sebastian Hartwig personalmen, ma il hat abandonat it e deletet li contenetes. On posse interim trovar quelc informationes pri li Interlingue e li Interlingue-Union sur li internet págine del internet jurnal IE-Munde quel es editet de Thomas Schmidt (vide http://www.ie-munde.com).

Li duesim grand punctu del conversation esset li possibil arangeament de un international conferentie de Interlingue in li annu 2015. Li preferet loc de un tal congress es li tchec cité capital Praha pro que it es central situat e bon atingibil e ne tro custosi. It es consentit que un fine de semane de venerdí til soledí vell esser ideal por un tal conferentie. Si un congress in Praha ne es possibil, it es decidet que li cité Ulm in li sud-west de Germania es li alternatives quam loc de un tal reunion.

Adplu Thomas Schmidt raportat pri nov developamentes de Interlingue in li internet. Quam administrator del Interlingue-Wikipedie su scope es atinger 2'500 articules in ti-ci annu. Il emfasat que il prefere scrir articules pri actual temas in li Wikipedie e ne solmen tre curt articules just por augmentar li númere de articules in li internet enciclopledie. Il adjuntet que li Facebook-gruppe de Interlingue ha crescet in li recent mensus e nu ja have 76 membres e es li max activ forum de Interlingue in li internet. Thomas Schmidt anc opinet que in li futur it es necessi publicar plu informationes pri Interlingue anc in important national lingues por atraer nov interessates e aprensores de Interlingue. Quelc persones ha demandat to in li Facebook-gruppe.

Donald Gasper informat pri nov developamentes in li interlinguistica. Il accentuat que it es important que institutiones quam li Esperanto-biblioteca in Aalen (Germania), li Esperanto-muséo con li colection de planlingues in Vienna e li Association por Interlinguistica (Germania) es informat pri li activitás de Interlingue e recive li jurnal Cosmoglotta.

Donald Gasper raportat pri li conferentie del Association por Interlinguistica in Berlin.

Li incontra evenit con excelent e calid tempe in li atrium del traditional bavarian restorería Augustiner in li centre de München. Li sol lingue del comunication durant li incontra esset Interlingue e to esset un impressiv pruva que li lingue de Edgar De Wahl vive e functiona quam un lingue del international comunication. Li incontra de München ha aprofundat li amicitá e collaboration inter li activistes de Interlingue e esset un nov passu in li direction vers un revification de un activ movement de Interlingue.